صوت المحيط : الحكاية نفسها

السلام عليكم ورحمة الله وبركاته

هذا وقت الحبة..وزمان المحبة هذا ماشيـ وقتو.

تقول لك الواحدة:

انا الىَ بْغيتْ نتزوج..

خصْني نتزوج نيت..

نْدي واحد لاباس عندو.في جيبو الدولار والدينار.

لانه ماعندي ماندير بواحد شمكار

ماخدام حتى على راسو..

ساكن ف غرفة مع جيش من العباد,مع موُ وباه وخُوتو!

ويقول لَك واحد من الدراري:

انا عييت ,سهرت وحفظت,وشديت الدبلوم ورا الدبلوم

شلة شهادات من الورق كلها معلقة ف بيت الوالدة

القلب يتحسر على الايام اللي ضاعتْ

غير ماتعلمت صنعة تنفعني وتعيشني..يكون بناقسْ من هاد الهم

وكان يكون خير لي ولوالدييا..

اللي عياوْ من المصروف علي صغير وكبير.

ودابا اش ندير؟

نبيع البلاد ونودع الصحاب..ونهاجر البلاد والحباب.

ماكاين غير هاد الشئ.

مابقات حتى حاجة تخليني نزيد نصبر مازال هنايا.

واللي ليها ليها هاديك الساعة.

لازواج لانه لاعمل ..ولاعمل لانه السياسة هيك حْكْمَت!

والكل باغي الحبة ..باغي الفلوس

لانه زمان الريال.

وكلْشي عارف انك ماتمشيش حاجة بلا ماني.

الريحة تعطاتْ.وفاحت بزاف.

انت ياولدي بلا الدرهم ماتسواش.

وحتى إنت يااختي ..

كلهم ولوا بغينها بنت برا..بنت الخارج.

تصوبْ ليهم الوراق.وضمن ليهم الاقامة والجنسية عاود.

لهيه

ماشي هنا.

اما اللي هنا...ماتفكري انهم راضيين بالعيشة هادي

هادو ياختي

باغيين واحدة خدامة..

تدخل المصروف وليها سيارة .ولو واليديها لاباس عليهم يكون مزيان.

هاكدا ياناس حكاية كل شاب وشابة ,ف بلادي العزيزة

نحكيوها ولانسكتوا عليها..

هي تحكي على راسها.

وياريتها حكاية..

هي حالة واقع يومي على شبابنا ساير.

ماعلي انا.ولله الحمد.

ياربي تتغير العقلية..ويرضى كل واحد بواحدة

تخاف عليه وتربي ولادو مزيان..

ماشي ضروري تخدم عليه او تكون بنت غني البلاد.

وياربي تتغير العقلية

وترضى كل واحدة بواحد

ولد البلاد ولد الناس متربي ..مالو اخلاقه ودينه.

والزمان عليه نتعاونو ماشي نستسلموا ليه ونخليوه يغلبنا.

بالمحبة كل شئ يهون.

وياناس الحبة تجي بالخدمة ..ماشي بشهادة معلقة تستنى الدولة.

الخدمة بالدراع ..بعرق الجبين

ماشي يالتشميكر وضياع الوقت ف القهاوي ومعاكسة بنات الحومة.

حشومة!!وعيب بزاف.

حنا دايما ولاد البلاد

بلادنا علينا امانة..

ولطيفة اختكم ليكم ولمصلحتكم تقول كل

هاد الحكاية.

إعادة نشر

نشر سابقاً الأربعاء..7يوليو الفين وسبعة

الحكاية هي هي..ماكاين حتى تغيير